Печал – Кочо Рацин

Нема ли живот, нема ли

љубов за живот голема,

љубов за живот човечна

у вија гради аргатски?

Нема ли срце, нема ли

срце – на срце срцето,

срце – ширини широко

срце – длабини длабоко –

цел свет да збере, па да е

за вија гради малечко?

Нема ли бел ден, нема ли

ден да е над деновите,

ден да е на аргатите –

ден – сонце вишен високо

ден – море ширен широко,

сонце да запре, да стои

и времето зачудено:

срцето пука обрачи

и плиска знаме алово,

срцето што се отвара

и шири ширно широко –

целиот свет да загрне!